រដ្ឋបាលខេត្តឧត្តរមានជ័យ

Oddarmeanchey Administration

រដ្ឋបាលខេត្តឧត្តរមានជ័យ

Oddarmeanchey Administration

ព្រះរាជាណាចក្រកម្ពុជា
ជាតិ សាសនា ព្រះមហាក្សត្រ

ឯកឧត្តម​ ឌី រ៉ាដូ អភិបាលរង​ខេត្ត អញ្ជើញជាគណៈអធិបតី ក្នុងកិច្ចប្រជុំបូកសរុបលទ្ធផលការងារឆ្នាំ២០១៩ និងទិសដៅការងារអនុវត្តបន្តឆ្នាំ២០២០ របស់មន្ទីរទេសចរណ៍ខេត្តឧត្តរមានជ័យ

ដោយ admin@oddarmeanchey.gov.khចំនួនទស្សនា (679)

(ឧត្តរមានជ័យ)៖ នៅព្រឹកថ្ងៃសុក្រ  ២កើត  ខែបុស្ស  ឆ្នាំកុរ  ឯកស័ក  ព.ស២៥៦៣  ត្រូវនឹងថ្ងៃទី២៧  ខែធ្នូ  ឆ្នាំ២០១៩  ឯកឧត្តម  ឌី  រ៉ាដូ  អភិបាលរងខេត្ត  តំណាងដ៏ខ្ពង់ខ្ពស់  ឯកឧត្តម  ប៉ែន  កុសល្យ  អភិបាល  នៃគណៈអភិបាលខេត្តឧត្តរមានជ័យ  អញ្ជើញជាគណៈអធិបតី រួមជាមួយនិង ឯកឧត្តម តុប សុភ័ក្រ្ត អនុរដ្ឋលេខាធិការក្រសួងទេសចរណ៍ ក្នុងកិច្ចប្រជុំបូកសរុបលទ្ធផលការងារទេសចរណ៍ឆ្នាំ២០១៩  និងទិសដៅការងារបន្តឆ្នាំ២០២០  របស់មន្ទីរទេសចរណ៍ខេត្តឧត្តរមានជ័យ។ និងដោយមានការអញ្ជើញចូលរួមពី  ព្រះមេគុណខេត្ត  ក្រុមប្រឹក្សាខេត្ត  កងកម្លាំងទាំង៣ប្រភេទ  ប្រធានសភាពាណិជ្ជកម្មខេត្តសៀមរាប-ឧត្តរមានជ័យ  មន្ត្រីរាជការ  បងប្អូនប្រតិបត្តិករសេវាទេសចរណ៍  សិស្សានុសិស្ស  និងអ្នកពាក់ព័ន្ធទាំងអស់។

រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ  ហ៊ុន  សែន  នាយករដ្ឋមន្រ្តី  នៃព្រះរាជាណាចក្រកម្ពុជា  បានធ្វើឱ្យកម្ពុជា  មានការរីកចម្រើនលើគ្រប់វិស័យទាំងសេដ្ឋកិច្ច  សង្គម  នយោបាយ  កាទូត  និងមានកិត្យានុភាពលើសកលលោក។

តាមរយៈការអនុវត្តគោលនយោបាយឈ្នះឈ្នះ របស់  សម្តេចតេជោ  នាយករដ្ឋមន្រ្តី  កម្ពុជាទទួលបាននូវសុខសន្តិភាព យ៉ាងពេញលេញ  ដែលពុំធ្លាប់មានក្នុងរយៈពេលជិត៥០០ឆ្នាំនៃ  ប្រវត្តិសាស្រ្តដ៏វែងរបស់កម្ពជា។ កត្តាសុខសន្តិភាព  និងស្ថិរភាពនយោបាយ  គឺជាមូលដ្ឋានគ្រឹះដ៏រឹងមាំ  សម្រាប់ធានាដល់ការអភិវឌ្ឍលើគ្រប់វិស័យក្នុងនោះរួមមានវិស័យទេសចរណ៍។ ទន្ទឹមនេះដែរ  លទ្ធផលការងារជាវិជ្ជមានរបស់វិស័យទេសចរណ៍ខេត្តឧត្តរមានជ័យសម្រេចបានក្នុងងឆ្នាំ២០១៩នេះ  គឺជាកិច្ចខិតខំប្រឹងប្រែងសម្រាប់យើងបន្តបោះជំហ៊ានទៅរកវឌ្ឍនភាពថ្មីៗ  ដែលរួមចំណែកយ៉ាងសំខាន់ក្នុងការអនុវត្តកម្មវិធីនយោបាយយុទ្ឌសាស្រ្តចតុកោណ  របស់រាជរដ្ឋាភិបាល  កម្មវិធីជាតិ  និងផែនការការងារផ្សេងៗទៀតរបស់ក្រសួងទេសចរណ៍ឱ្យទទួលបាន  ជោគជ័យ។

ជាមួយគ្នានេះដែរ  នៅក្នុងរបាយការណ៍របស់   លោកស្រី ធិននី មុនីរស្មី ប្រធានមន្ទីរទេសចរណ៍ខេត្តឧត្ដរមានជ័យ បានឱ្យដឹងថា ភ្ញៀវទេសចរ ដែលមកកំសាន្ត និងស្នាក់នៅ ក្នុងខេត្តឧត្តរមានជ័យ ក្នុងឆ្នាំ២០១៩ ពិនិត្យឃើញថាអ្នកទេសចរក្នុងស្រុក សរុបមានចំនួន ១៨២.២៨១នាក់ បើប្រៀបធៀបនឹងឆ្នាំ២០១៨ មានចំនួន១២៦.៨១៦នាក់  មានការកើនឡើង  ៤៤%  ចំណែកឯ ភ្ញៀវទេសចរអន្តរជាតិសរុបមានចំនួន៥.០២៧នាក់ បើប្រៀបធៀបនឹង ឆ្នាំ២០១៨ មានចំនួន  ៣.៧៧១នាក់  ថយចុះ  ២៥%។ គួរគូសបញ្ជាក់ដែរថា  នៅក្នុងខេត្តឧត្តរមានជ័យ  មានរមណីយដ្ឋាន÷ រមណីយដ្ឋានប្រវត្តិសាស្រ្តអន្លង់វែងមាន១៤កន្លែង  ដែលកំពុងទទួលបាននូវភាពទាក់ទាញពីភ្ញៀវជាតិ  និងអន្តរជាតិ  ក្នុងការសិក្សាស្រាវជ្រាវ  និងស្វែងយល់អំពីប្រវត្តិសាស្រ្តក្នុងរបបខ្មែរក្រហម  ប្រាសាទបុរាណមាន៩៨កន្លែង  ទួលប្រាសាទ  បុរាណ៤៧  រមណីយដ្ឋានធម្មជាតិ  ១០កន្លែង  ស្ពានបុរាណ  មាន១១កន្លែង  និងទួលបុរាណមាន៦៧កន្លែង។ ចំពោះសេវាសណ្ឋាគារ  ផ្ទះសំណាក់រួមមាន÷ សណ្ឋាគារចំនួន៥កន្លែង  សរុប៣២២បន្ទប់  ផ្ទះភ្ញៀវចំនួន៣៧កន្លែង  សរុប៥១១បន្ទប់  ផ្ទះជួលបន្ទប់ស្នាក់នៅចំនួន៤០កន្លែង  សរុប៣៥៤បន្ទប់  ភោជនីយដ្ឋានចំនួន៨កន្លែង  អាហារដ្ឋានចំនួន២៦កន្លែង  ផ្ទះលក់បាយចំនួន៧កន្លែង  ខារ៉ាអូខេចំនួន២៤កន្លែង  និងកន្លែងម៉ាស្សាចំនួន២៤កន្លែង។ ក្នុងនោះដែរ  ខេត្តឧត្តរមានជ័យ  មានច្រកទ្វារព្រំដែនចំនួន៣រួមមាន÷ច្រកជប់គគីរ  ច្រកអូរស្មាច់  និងច្រកជាំសាង៊ាំ  ដែលជាប់ជាមួយខេត្ត៣នៃព្រះរាជាណាចក្រថៃ  រួមមាន÷ខេត្តបុរីរ៊ាំ  ខេត្តសុរិន្ទ  និងខេត្តស៊ីសាកេត ។ ដោយច្រកទ្វារព្រំដែនចំនួន២ជាច្រកទ្វារអន្តរជាតិរួមមាន÷ច្រកទ្វារអន្តរជាតិអូរស្មាច់  និងច្រកទ្វារអន្តរជាតិជាំសាង៊ាំ  ហើយច្រកមួយទៀតជាច្រកតំបន់ប៉ុណ្ណោះ។

ព្រឹត្តិការណ៍ព័ត៌មាន
សេវាពេញនិយម
សេវាថ្មីៗ
ODDAR MEANCHEY WEATHER
ព័ត៌មានជាប់ទាក់ទង

ភូមិបុរីរដ្ឋបាល សង្កាត់សំរោង ក្រុងសំរោង ខេត្តឧត្ដរមានជ័យ

អ៊ីមែល : info@oddarmeanchey.gov.kh

លេខទូរស័ព្ទ : (+855) 88 33 77 345

© 2021

រក្សាសិទ្ធិគ្រប់យ៉ាងដោយ៖ រដ្ឋបាលខេត្តឧត្តរមានជ័យ

កែប្រែចុងក្រោយ : 1 សប្ដាហ៍មុន